Djenica se non jèn fanm sa ki sòti nan vil Laskawobas ki rann dènye souf li jodi jedi 19 septanm 2024 la, nan lopital leta Mibalè a. Selon plizyè medya lokal, se ta mari viktim nan ki pote non Vila ki te ponyade l ak yon kout kouto nan do madi ki te 17 septanm pase a.
“Aprè plizyè tantativ medsen nan lopital inivèsitè Mibalè pou te bay lavi ak Djenica ki te resevwa kout ponya nan men mari li, Vila, li rann dènye souf li”, daprè sa jounalis Wisnic John Rondeau fè konnen. Fòk nou soulinye, se sitwayen sa menm ki te pataje SOS pou te ka ede viktim nan aprè l te fin resevwa kout kouto a nan men mari li a egzakteman sou pon Lasous ki twouve l nan vil Laskawobas.
Pou sa ki gade Vila, ki se prezime asasen an, li ta deja jwenn arestasyon li nan lannuit ki te mèkredi 18 septanm nan. E pou kounye a li twouve li nan komisarya Laskawobas la pou tout suivi ka li a bezwen.
N ap fè konnen, se dezyèm ka feminisid ki fèt nan peyi a pou mwa septanm nan, kote patnè fanm viktim sa yo te jis deside retire lavi yo. Fòk nou di, malgre arestasyon Almando Duflerent ki te retire lavi Mike fanm Yogann 5 septanm pase a, sa pa t anpeche popilasyon an te ba li bw@ k@le pandan lapolis t ap transfere l nan yon lòt espas jou ki te 9 septanm 2024 la.
Atik sa se pwopriyete prive ©️ Gwoup Medya MAGHAITI 2024
