Nan aprè midi mèkredi 11 septanm 2024 la, gwo batay eklate ant gwoup gang nan katye Simon ak sila yo ki nan Boston anndan komin Site Solèy.
Gè sa daprè temwanyaj yon abitan nan Simon/ Pele, deklannche nan yon chanpyona ki t ap fèt anndan Boston. Abitan an rapòte tou se youn nan ekip yo ki pèdi, men ki pa dakò e sa lakoz diskisyon epi touswit aprè gè a eklate.
Yon lòt abitan ki t ap pale sou Radyo Mega fè konnen plizyè moun ki sòti nan Simon ki te al asiste final sa paka sòti nan Boston akoz batay la fèt nan yon bat je.
Pou sa ki gen pou wè ak viktim gè sa ta lakoz yo, pou kounye a tou 2 kan yo genyen moun ki viktim. Jiska 10 zè nan lannuit mèkredi 11 septanm nan, bal pa t sispann chante e gen fanmi ki te menm ap eseye chape pou l yo malgre lapli t ap tonbe.
Fòk nou di, nan dat ki te 25 jiyè 2024 la, se te gwo kontantman ki te genyen anndan komin Site Solèy pwiske gwoup gang yo te deside fè lapè. Poutan, 2 mwa aprè sitiyasyon an ta riske retounen menm jan an aprè gwo batay sa fin pete nan mitan manm gang Viv ansanm yo.
Atik sa se pwopriyete prive ©️ Gwoup Medya MAGHAITI 2024
