Atis ayisyen an, Wyclef Jean reyaji kèk jou aprè sou move tretman imigran ayisyen yo ap sibi nan vil Springfield, Etazini.
Wyclef Jean ki t ap bay enpresyon l nan TMZ TV sou sitiyasyon Ayisyen ki nan dyaspora a, defann konpatriyòt li yo pandan li deklare Ayisyen yo se bon moun yo ye. Li fè deklarasyon sa a akoz fo enfòmasyon ki te fè kwè Ayisyen yo t ap vòlè epi manje bèt sitwayen ameriken yo.
Li te pwofite mete aksan sou nesesite ki genyen pou politisyen ameriken konsantre yo sou reyalite nan eleksyon k ap vini yo olye fè konplo ak divizyon sou lòt moun.
Wyclef Jean yon lòt bò, ensiste sou imigran yo sitou Ayisyen yo ki daprè sa l di se manm enpòtan nan kominote ameriken an. «Nou pran swen limanite. Nou pran swen vwazen nou yo», se sa l deklare pandan l voye jete byen lwen tout akizasyon yo ki pou li menm pa gen pyès prèv.
Atik sa se pwopriyete prive ©️ Gwoup Medya MAGHAITI 2024
