Omwen 2 moun pèdi lavi yo epi 2 lòt sòti blese aprè yon dal te fin tonbe sou yo ayè madi premye jiyè 2025 lan nan zòn Wanament espesyalman nan Diwo. Selon bilan pwovizwa Pwoteksyon Sivil nan zòn nan bay, jij lapè ki te fè konsta yo revele gen sèlman 2 kò yo jwenn ki pa gen lavi ladan yo.
« Gen yon dal ki efondre nan lokalite Diwo nan komin Wanament, nou ap fè tout sa n kapab ak tout sektè yo pou n kapab retire mas beton an pou n ka jwenn moun ki kwense yo », se sa responsab yo nan Pwoteksyon sivil fè Mag Haiti konnen sou dram sa ki pase a.
Annatandan dènye bilan yo, Pwoteksyon sivil anonse li prezan ak tout lapolis nan espas la. Se yon fason pou kapab retire lòt kò ki ta anba dekonm yo puiske selon divès temwen ta gen plizyè bòs mason ki t ap travay sou chantye a nan moman kote dal la te tonbe a.
Fòk nou di, se yon sitiyasyon ki mete anpil lapèn lakay fanmi ak kominote sa a. Se sa ki fè, plizyè nan yo pa t pèdi tan pou te vini nan espas la epi al chache nan lopital vil la pou konnen si pa gen nan bòs yo ki se ta moun yo ki rive viktim.
©Atik sa se pwopriyete prive © Gwoup Medya MAGHAITI 2025
