Akoz yon ond twopikal k ap pase nan peyi a, vil Okay ki twouve l nan Sid Ayiti leve anba gwo dlo jodi madi 12 novanm 2024 la. Daprè SOS Haïti-Météo, plizyè zòn nan vil la gentan inonde.
«Sos pou Okay. Gwo inondasyon pandan pasaj ond twopikal sa sou Ayiti sitou depatman Sid», daprè sa estrikti meteyowoloji a pataje sou rezo sosyàl li yo. Anplis sa, divès videyo ak foto montre kòman sitiyasyon an ye aprè lapli pa sispann tonbe nan zòn sa.
Daprè Pwoteksyon Sivil ki site Inite Idwometeyowolojik peyi a, gen anpil posiblite pou ta kontinye gen inondasyon, glisman tè ak deboulonnay nan depatman Sid, Grandans ak Nip pandan jounen an ak pandan sware a. Yo anonse tou, depatman sa yo ap gen gwo aktivite lapli, loray ak gwo van sou yo.
Se pou tèt sa, responsab yo mande pou popilasyon an fè anpil pridans pandan y ap suiv tout konsiy otorite yo paske sezon siklòn nan poko fini.
Nan ka inondasyon ak gwo van men tout Konsèy Pwoteksyon Sivil bay: «kite zòn ki gen danje yo pou ale nan mòn, pa ale nan zòn ki konn inonde yo, mete tout papye enpòtan yo ansanm yon kote ki asire, lè gen loray rete anndan kay, pran prekosyon ak tout sa ki ka tonbe oubyen vòltije, pa monte sou do kay».
Atik sa se pwopriyete prive ©️ Gwoup Medya MAGHAITI 2024
