Nan 6 rapò yo pibliye sou divès ka koripsyon ki genyen nan kèk bwat leta, Inite Lit Kont Koripsyon (ULCC) fè konnen ansyen direktè Ofis Asirans Aksidan Travay Maladi ak Matènite (OFATMA) a, Carl François te fè anpil magouy pou zanmi politik li te ka fè lajan nan leta a. Òganis la deklare depi lè li te pran fonksyon an li te angaje 2 antrepriz ki fè manje. Pami yo Oley Event and Food Services, ak Valcuisine, yo jwenn ki pou Valérie Nadia Victor ki se manm pati politik MTVAyiti menm jan ak li. Se nan menm kesyon zanmitay sa yo di li fè Direksyon jeneral Enpo (DGI) pèdi plis pase 2 milyon goud puiske li pa t deside retire taks sou antrepriz yo.
«Yo bay tout lajan ki te nan chèk Valcuisine ak Oley Event and Food Services san yo pa t retire 2% sou chak kontra yo ki te dwe al jwenn DGI», se sa komisyon ankèt la ekri. Yo soulinye tou sou 107 743 312.6 goud administrasyon Carl François a te dekese pou 2 antrepriz yo, DGI pèdi 2 153 192.72 goud.
Anplis privilèj sa li fè zanmi politik li jwenn nan, ULCC fè konprann mesye François pa t fè okenn demach jan lalwa di li a pou antrepriz sa yo te rive jwenn kontra yo. E li te fè anketè yo konnen antrepriz ki te la avan l lan te twò chè se rezon sa li te bay pou te defann lòt antrepriz yo. Tandiske, anketè yo di yo jwenn moun yo sa koute bwat la plis kòb toujou. Yon lòt kote, yo kritike dèske Valcuisine gen papye ki pa menm nan bazdone OFATMA. Malgre tout iregilarite yo, òganis la di sòti 2022 pou rive 12 fevriye 2025, bwat leta a te dekese kanmenm o total 107 743 312.6 goud pou 2 antrepriz yo. Valcuisine pou kont pa li te jwenn 102 872 412.00 goud.
Mete sou sa, ULCC bay lòt detay pou fè konprann antrepriz zanmi ansyen direktè a anrejistre nan ministè komès sèlman 6 jou aprè mesye François te pran tèt enstitisyon an nan dat ki te 6 mas 2022 a. ULCC mansyone yo jwenn kontra avan yo te gen kat imatrikilasyon e yo rive touche 16 jou aprè tout pwosesis anrejistreman yo te fin fèt.
Se tout magouy sa yo ki fè Inite Lit Kont Koripsyon mande sou plan administratif pou lakou dèkont mennen yon ankèt sou jesyon ansyen nimewo 1 OFATMA a, kanpe kontra 2 antrepriz yo, fè yo bay DGI lajan yo pa t bay la, epi pou yo rekanpe Komite Espesyalize Mache Piblik (CSMP) anndan enstans lan. Sou plan penal, yo mande pou lajistis mare Carl François dèske li fè abi fonksyon, pèmèt gen pasasyon ilegal mache piblik, pwofite sitiyasyon an, epi bay manti. Se pou sa tou Valmine Jean Jacques, ak tout manman l Valérie Nadia Victor dwe ale lajistis tou. Pou sa ki gade antrepriz yo, yo vle pou lajistis bloke kont yo genyen yo jiskaske yo peye DGI.
Atik sa se pwopriyete prive ©️ Gwoup Medya MAGHAITI 2025
