Pou ede lajistis ak zak koripsyon k ap fèt nan Ofis Nasyonal Asirans Vyeyès (ONA) ak nan Ministè Zafè Sosyal (MAST), Inite Lit Kont Koripsyon (ULCC) lonje dwèt sou 2 gwo fonksyonè leta ki ta koupab. Se pou sa nan rapò yo pibliye ayè madi 3 septanm 2024 la, yo mande pou lajistis ayisyèn mare ansyen minis Pierre Ricot Odney ak ansyen direktè ONA a, Jemley Marc Jean Baptiste.
Ajan ULCC yo fè demann sa aprè yo jwenn ansyen chèf ONA a te lonje 22 011 664.95 goud je fèmen bay ansyen chèf MAST a pou te peye dèt nan mwa mas 2021 an.
Selon rapò a ki site pawòl Mesye Ricot, lajan sa te sèvi pou te peye dèt ministè a nan yon dosye kit alimantè ak sanitè pou moun ki te nan bezwen.
Men, sa ki fè anketè yo lonje dwèt sou 2 ansyen lidè yo se dèske yo toulède vyole règ mache piblik la ki di kòman leta dwe achète nan men kèlkeswa antrepriz la, e ki divès lwa ki dwe respekte. Sa ki te diferan, paske 4 antrepriz ONA peye yo kat imatrikilasyon fiskal yo ak patant yo pa t bon. Anplis sa, ULCC fè konprann yo jwenn menm antrepriz sa yo malgre yo pa t dwe nan fè komès ak leta te fè 17 404 253.50 goud ak Kèz Asistans Sosyàl (CAS) nan mwa novanm 2021 an toujou pou kit alimantè ak sanitè.
Daprè rapò a men tout detay ki konsène antrepriz sa yo nan 4 chèk ki te sòti nan ONA: Saga dépôt te jwenn 5 468 181 95 goud, God Provides P.A te pran 5 518 447.00 goud. Yon lòt bò, yo te bay Nerezia Distribution 5 526 675.00, tandiske Shamma Distribution li menm te sòti ak 5 498 361.00 goud.
Aprè tout konsta sa yo, anketè yo deklare mesye Pierre Ricot Odney te chwazi ak pwòp konsyans li pou li te vyole lalwa. Se sou baz sa yo fè konnen ansyen minis la fè yon abi fonksyon paske l te fè sa nan lide pou te fè mèt antrepriz sa yo jwenn avantaj.
Nan sa ki gade ansyen direktè Jemley Marc Jean Baptiste la li menm, rapò a di li pa t byen jwe wòl li ditou nan ONA. Paske yo fè kwè li retire plis kòb pase sa l te dwe depanse chak mwa. Nan sans sa, yo fè referans ak bidjè enstitisyon an ki te 5 417 883.33 goud nan egzèsis fiskal 2021-2022 a, poutan pou mwa mas 2022 a sèlman mesye Jean Baptiste te retire yon sèl kou 22 011 664.95 goud bay reprezantan MAST epòk la.
ULCC akize ansyen nimewo 1 Ofis Nasyonal Asirans Vyeyès la tou paske li pa peye taks nan Direksyon Jeneral Enpo (DGI). Efektivman yo di yo jwenn sou chak kòb li te bay 4 antrepriz nou sot site yo, li te rive retire 2 001 060.45 goud kòm taks pou DGI. Men, jouskaprezan pa gen yon goud ki al jwenn DGI vre.
Se pou sa, anketè yo pwofite denonse move pratik sa anndan ONA a, kote yo soulinye sa repete plizyè fwa pou gwo lajan taks sa yo pa janm antre nan kès leta. Se yon aksyon selon yo menm ki fè leta pa janm ka rive reyalize kèk objektif li genyen sou bidjè.
«Aprè tout sa yo, komisyon ankèt la rekòmande sou plan penal pou lajistis mare Pierre Ricot Odney ak Jemley Marc Jean Baptiste pou abi fonksyon. Zak lalwa 12 mas 2014 la pini nan atik 5.5 sou prevansyon ak represyon koripsyon», toujou daprè rekòmandasyon ki sòti nan rapò a. Sou plan administratif, yo mande pou lajistis chache plis sou jesyon 2 akize yo, epi pou ONA degaje l pou l bay lajan li dwe DGI a.
Atik sa se pwopriyete prive ©️ Gwoup Medya MAGHAITI 2024
