Nan yon rapò yo rann piblik jodi mèkredi 2 oktòb 2024 la, Inite Lit Kont Koripsyon (ULCC) mande pou lajistis arete konseye prezidansyèl Smith Augustin, Emmanuel Vertilaire ak Louis Gérald Gilles. Daprè dokiman an twa manm Konsèy Prezidansyèl Tranzisyon sa yo te itilize pouvwa yo pou te fè koripsyon nan pran lajan nan men Raoul Pascal Pierre Louis pou te fè l tounen nan tèt Bank Nasyonal Kredi (BNC) a ankò.
«Paske yo te eksjije epi aksepte yon avantaj pandan yo nan pòs la Smith Augustin, Emmanuel Vertilaire ak Louis Gérald Gilles abize fonksyon yo e te mande pou resevwa lajan anba tab epi koripsyon pasiv», se tout akizasyon sa yo ki sou do 3 konseye yo. Se sa ki fè, anketè yo soulinye tout zak sa yo lalwa 12 mas 2014 la pini yo nan atik 5.5, 5.6, ak atik 11 lan ki pale sou prevansyon, represyon ak koripsyon.
Nan kad 100 milyon goud Raoul Pierre Louis te di konseye sa yo te mande li a, ULCC di li jwenn efektivman te gen plizyè reyinyon ki te fèt pou 2 pati yo te jwenn antant ant yo menm. Yo soulinye, antant moun yo te rive fè yo dakò pou lajan an te al jwenn chak manm Konsèy nou site la yo sou kat kredi BNC yo. An echanj, prezidan Konsèy Administrasyon Bank lan li menm t ap ka tounen nan pòs prezidan li, puiske manda li te prèske fini nan moman negosiyasyon yo.
Nan yon bò, yo jwenn se mesye Pierre Louis menm ki te bay tout enstriksyon pou kat kredi konseye yo te fèt nan Bank lan. Yo fè konnen, nan dat 15 me pase a kat kredi Smith Augustin ak Lonick Léandre, ki se konsil Ayiti nan vil Santyago te gentan enprime. Tandiske pa Emmanuel Vertilaire la ak Louis Gérald Gilles te fèt 27 me 2024, aprè gwo reyinyon ankachèt moun sa yo te fè nan otèl Wazis 24 me 2024 sou menm dosye sa a.
Yon lòt bò, yo fè konprann Kat kredi 3 konseye prezidansyèl yo te gen yon limit 1 800 000. 000 goud ki egal ak 20 mil dola ameriken. Alòske Lonick Léandre li menm te gen 1 125 000. 000 goud ki bay 12 500 dola vèt. Poutan, nan tranzaksyon ki fèt yo ULCC di li jwenn sòti 27 pou rive 11 jiyè Smith Augustin achete 15 bagay li ki bay ototal 872 220.40 santim san remèt BNC yon goud. Konsil Lonick Léandre li li menm te depanse 546 921.60 goud san bay BNC lajan tou.
Ansyen jij Emmanuel Vertilaire te depanse 1 078 225.61, doktè Louis Gérald Gilles te achète li menm pou 1 027 336.82 goud. Sèl diferans lan daprè ULCC se paske 2 moun sa yo yo menm yo te kòmanse peye Bank Nasyonal Kredi.
Se pou tout sa yo, ki fè Inite Lit Kont Koripsyon sou plan penal mande pou lajistis mare ni konseye yo ak tout konsil Ayiti nan vil Santyago a. Anplis sa sou plan administratif yo mande elaborasyon adopsyon epi piblikasyon yon kòd etik sou ajan administrasyon yo, epi pou pi wo nan leta yo ede nan pale sou gid pratik ULCC ekri pou ajan piblik yo.
Atik sa se pwopriyete prive ©️ Gwoup Medya MAGHAITI 2024
