Inite lit Kont Koripsyon (ULCC) mande lajistis pou l mete aksyon piblik kont Germain Paulémon ak Max Alex Joseph, direktè jeneral ak direktè adjwen nan Sevis Nasyonal Jesyon Fatra Solid (SNGRS) poutèt yo vòlè gaz enstitisyon y ap dirije a.
Nan sousi pou aji nan transparans konsènan jesyon k ap fèt nan bwàt leta yo epi goumen kont koripsyon, Inite Lit Kont Koripsyon (ULCC) te pibliye 8 rapò ankèt sou koripsyon madi ki te 3 septanm 2024 la. Nan rapò sa, li mande pou Germain Paulémon ki se direktè jeneral SNGRS ak Max Alex Joseph li menm ki se direktè adjwen pran kòd.
ULCC mande sa akoz yo jwenn mesye yo mete ansanm pou te vòlè yon total 197 499.57 galon dyezèl pou yon montan 102 423 688,00 goud. Selon yo menm, aksyon sa fèt sòti nan mwa desanm 2021 pou rive avril 2024.
2 fonksyonè leta yo ki t ap reponn kesyon anketè ULCC yo rekonèt yo te pran gaz ki te la pou ranmase fatra nan peyi a. Bò kote pa l, Germain Paulémon nan moman odisyon l lan di li rekonèt li te konn itilize gaz enstitisyon an pou dèlko pèsonel li men pa chak jou.
Yon lòt bò Max Alex Joseph rekonèt zafè pran gaz enstitisyon an pou mete nan dèlko lakay li a pa bon e lalwa pini sa. Men, li fè konnen li te bloke nan peryòd lòk la se sa k fè li te fè sa.
Selon sa rapò a di, tou 2 direktè yo te genyen Babiana Bélizaire, direktris bidjè, ki te ede yo vòlè 197 499.57 galon dyezèl yo. Paske nan deklarasyon madanm nan fè, li fè tout moun konnen direktè yo konn voye moun pran gaz se vre men li menm djòb pa li se te prepare fo rapò.
Sòti desanm 2021 pou rive avril 2024, rapò a releve se 227 485 000.00 goud ki te sòti nan SNGRS pou achte gaz pou bay konpayi ki rele «LEGACY DISTRIBUTION» an. Pandantan sa li soulinye gaz sa yo konn achte yon fason pou asire operasyon regilye machin SNGRS yo ak jeneratè enstitisyon an.
ULCC mande pou aksyon piblik mete an mouvman kont direktè sa yo pou detounman byen piblik, abi fonksyon. Babiana Bélizaire li menm lajistis dwe pousuiv li pou konplisite nan detounman byen piblik ak asosiyasyon malfektè.
Atik sa se pwopriyete prive ©️ Gwoup Medya MAGHAITI 2024
