Nan rapò 48 paj li sòti sou sa k ap pase nan divès enstitisyon nan leta a, ULCC kwè li nesesè pou lajistis ta arete Marriantha Méroné pou koripsyon nan Sant Resepsyon ak Livrezon Dokiman Idantite (CRLDI). Daprè ankèt ki mennen an, malgre madanm Meroné te transfere Petyonvil yo di li te toujou konn ap resevwa lajan nan sèvis Direksyon Imigrasyon ak Emigrasyon (DIE) nan Ayewopò Tousen Louvèti a.
Nan odisyon avèk ajan ULCC yo, akize a te fè konnen chèk travay li nan CRLDI vini l 43 363.70 goud anplis 80 mil goud kòm responsab, 15 mil goud sou kat debi epi 10 mil goud pou gaz chak mwen. Men, nan chache diplis anketè yo montre yo jwenn madanm Méroné te toujou konn ap touche ant 180 ak 200 mil goud chak mwa nan ayewopò a, alòske li pap travay nan depatman sa ankò.
Nan sans sa, ULCC di li jwenn se Jean Osselin Lambert, ansyen responsab Direksyon Imigrasyon ak Emigrasyon (DIE) ki konplis madanm nan. Ki te konn pèmèt li te kontinye ap touche nan DIE kote l t ap travay avan l te jwenn transfè pou CRLDI.
Yon lòt kote, komisyon ankèt la di yo te konstate tou te gen gwo lajan tankou 33 865 569.66 goud ki te depoze sou 3 kont bankè responsab CRLDI Petyonvil la genyen. Poutan, ULCC soulinye pa gen youn nan depo sa yo Marriantha Méroné te ka bay eksplikasyon sou kote tout lajan sa yo te sòti. Sa ki te pouse l bay ajan yo manti pou te kapab kache verite sou lajan yo.
Nan sans sa sou plan administratif, Inite Lit Kont Koripsyon mande pou leta revoke Marriantha Méroné. Yo mande pou gen verifikasyon nan CRLDI, ak sou kont Ministè Enteryè ak Kolektivite teritoryal ki nan Bank Nasyonal Kredi a (BNC). Puiske, selon yo menm se kont sa ki sèvi pou peye lè anplis ak tout anplwaye DIE nan ayewopò a. Epi yo mande tou pou DIE koupe sitirans peye gwo lajan ki pa jistifye ak anplwaye yo.
Sou plan penal, ULCC mande pou lajistis arete responsab Sant Resepsyon ak Livrezon Dokiman Idantite Petyonvil la, ak tout konplis li a ki se Jean Osselin Lambert. Pou fini, yo rekòmande pou lajistis bloke tout kont ak finansman Marriantha Méroné genyen.
Atik sa se pwopriyete prive ©️ Gwoup Medya MAGHAITI 2024
