Nan lit yo ap mennen pou kaba koripsyon anndan leta a, Inite Lit Kont Koripsyon (ULCC) mande pou lajistis ayisyèn mare 13 ansyen ak aktyèl diplomat peyi a. Selon eksplikasyon yo bay nan yon ankèt yo mennen, moun sa yo te deside vyole lalwa kote yo pa t fè okenn deklarasyon patrimwàn.
Men lis diplomat yo daprè ULCC : Gilles Stéphane ansyen konsil nan Miyami, Léon Charles anbasadè epi reprezantan Ayiti nan Òganizasyon Eta Ameriken yo (OEA), Jean Yves Rody anbasadè Ayiti nan Meksik, Jean Josué Jean anbasadè peyi a Lafrans, Rockfeller Jules Samuel konsil Ayiti ki Lafrans la.
Nan yon lòt bò, nou jwenn anbasadè Ayiti an Almay ki se Bataille Frantz, Benoît Lesly anbasadè ayisyen ki Vyetnàm nan, Lamur Regine ki se anbasadè ayisyen Kiba, François Wedlyne anbasadè peyi a Chili, konsil François Guerrier nan Dajabon, konsil Saget Walfaud nan Awouba, Jean-Pierre Garvey anbasadè Ayiti nan Sendomeng epi konsil Jean-Phillipe Ricardo Ralph nan Òlanndo.
ULCC mande pou aksyon piblik mete kont diplomat sa yo ki pa t ranpli fòm deklarasyon patrimwàn nan, menm aprè yo te raple yo sa. Kidonk, aksyon yo a pèmèt yo fè yon enfraksyon ki merite sanksyon daprè sa atik 18 lalwa 12 fevriye 2008 la ak lalwa 28 kòd penal ayisyen an di.
Mete sou sa, enstans k ap goumen kont koripsyon an mande pou lajistis entèdi 13 fonksyonè leta sa yo pou yo pa gen dwa civil, politik ak fanmi. Sa ki vle di moun sa yo pap gen dwa pou yo vote, ni pou yo poze kandida pandan tan lalwa prevwa pou sa fèt la.
Atik sa se pwopriyete prive ©️ Gwoup Medya MAGHAITI 2024
