Nan rapò ankèt li remèt ak lajisitis ayè madi 3 septanm 2024 la, Initie Lit Kont Koripsyon (ULCC) mande pou lajistis mete anba kòd 8 kad nan Pwogram Nasyonal Kantin Eskolè (PNCS) pou detounman byen piblik.
Phanèse Laguerre ansyen kòdonatris jeneral bwàt la, Alberto DORT, Miratel Fanor, Paul Wilson JEAN HILAIRE, Dieu-Donne FRANÇOIS, Junior Lavaud ak Jean Junior Célicourt se moun sa yo rapò ULCC a lonje dwèt sou yo akoz yo kreye fo antrepriz pou vòlè lajan PNCS.
Daprè sa ki di nan rapò a, pandan madanm Phanèse Laguerre t ap jere enstitisyon an, sòti nan mwa oktòb 2016 pou rive 18 fevriye 2021 anpil magouy fèt anndan an. Nan menm peryòd sa, ototal yo jwenn se 382 538 646.14 goud ki sòti nan bwàt la pou achte manje.
ULCC di malgre kantite lajan sa, komisyon ankèt la dekouvri pi fò antrepriz ki te vann yo manje yo pa gen adrès poutan dosye yo byen trete nan PNCS. Li soulinye tou, se sèl antrepriz «BUSINESS CENTER» ki genyen adrès li nan Dèlma 49.
Nan kad ankèt sa, anketè yo nan ULCC jwenn plizyè kad nan PNCS ki kreye fo antrepriz pou te kapab vòlè lajan nan trezò piblik la. Kèk nan antrepriz sa yo se anplwaye enstitisyon an menm k ap dirije yo.
Pou l apiye sa l di a, Inite Lit Kon Koripsyon site Alberto Dort ak Miratel Fanor ki se mèt «Endivenpral Import-Export» ak «La Trévienne Production». Kont labank antrepriz sa yo selon rapò a, se Paul Wilson Jean Hilaire ak Dieu- Donne François ki siyen l e tou 2 se anplwaye PNCS.
Anplis fo antrepriz ki kreye pou vòlè lajan sa yo, men komisyon ankèt la dekouvri fason PNCS itilize pou achte pwodwi manje yo vyole lejislasyon sou pasasyon mache yo.
Poutèt sa, ULCC mande lajistis ayisyèn mete aksyon piblik an mouvman kont Alberto Dort, Miratel Fanor, Paul Wilson Jean Hilaire, Dieudonne François, Junior Célicourt, Magarie Toussaint, Jean Junior Célicourt, Phanèse R. Laguerre pou deli yo fè, abi fonksyon, detounman byen piblik jan atik 5.5 lwa sou prevansyon ak represyon kopripsyon an mande sa ak jan atik 5.11 ak 5.13 lwa 12 mas 2014 la mande sa.
Pandantan sa, rapò a soulinye pandan gouvènans ansyen kòdonatris la li fè anpil magouy nan enstitisyon an. Se pou sa yo releve genyen 250 376 187.13 ki manke nan kès leta a, nan menm lajan sa gen 117 250 376 187.13 goud ki se lajan ilegal moun yo vòlè pou pwòp enterè yo.
Pou fini, ULCC fè konnen ankèt sa fè yo dekouvri ansyen kòdonatris la, Phanèse Laguerre ak Junior Lavaud Celicourt te itilize pouvwa yo pou te fè fo papye nan sa k gen pou wè ak pwodwi yo konn achte yo.
Atik sa se pwopriyete prive ©️ Gwoup Medya MAGHAITI 2024
