Daprè yon konvokasyon Direksyon Santral Polis Administratif voye bay plizyè responsab nan lapolis la, tout rejyon metwopolitèn Pòtoprens lan anba gwo menas gang ak zam pou wikenn sa. Nan sans sa, enspektè jeneral la, Alain Auguste mande Direktè Depatman Lwès 1 ak 2 ak responsab inite espesyalize yo pou konvoke tout polisye ki sou lòd yo pou kapab fè fas kare ak bandi yo.
«Depi kounye a nou konnen zòn metwopolitèn Pòtoprens lan sou alèt wouj e nou dwe kwape l. Paske, selon kèk enfòmasyon nou ka fè konfyans, bandi ak zam yo ap prepare yo pou lanse divès atak teyoris pandan wikenn nan menm», daprè sa enspektè a fè konnen nan yon lèt ki pran lari ayè vandredi 20 desanm 2024 la.
Pou prepare kont atak bandi yo, responsab la mande pou Direktè Depatman Lwès 1 ak 2 ak responsab inite espesyalize tankou GIPNH, CIMO, CBIM, POLIFRONT, DCPR, UTAG, CEP, UDG, POLITOUR, Lapolis kominotè, USPM, ak USD konvoke tout polisye ki anba kòmandman yo, pou yo rete nan komisarya yo epi mobilize jouskaske alèt la leve.
N ap raple, nèg ak zam yo te lanse plizyè atak nan jou pase yo nan Dèlma 19, Nazon, ak Pòs Machan kote yo te boule plizyè kay ak machin. Se yon bann aksyon ki lakoz, jounen jodi a selon Òganizasyon Entènasyonal Migrasyon (OIM), nan Pòs Machan sèlman genyen 10 867 abitan ki kouri kite kay yo pou bandi.
Atik sa se pwopriyete prive ©️ Gwoup Medya MAGHAITI 2024
