Nan yon kominike yo pibliye ayè lendi 25 novanm 2024 la, Fon Nasyonzini pou timoun (UNICEF) fè konnen kounye a la timoun yo reprezante mwatye nan gwoup gang yo an Ayiti. Selon yo menm, nan sèlman yon lane chif timoun gang yo mache pran yo monte ak 70 %.
«Yo pran nan pyèj, timoun an Ayiti ki antre nan gwoup gang yo vin pi plis, alòske se menm gang sa yo ki responsab sitiyasyon dezespere yo ye a», daprè deklarasyon direktris jeneral UNICEF la, Catherine Russell.
Selon òganis entènasyonal la, ogmantasyon sa yo rive konstate l nan 2yèm trimès ane 2023 ak 2024 la. Se pou sa, pi devan yo soulinye : «Nan moman sa menm timoun yo rive menm reprezante mwatye nan manm gwoup ak zam yo».
Nan eksplikasyon li bay yo, UNICEF fè konprann timoun ki vin gang yo se gen plizyè rezon ki lakoz. Afwontman yo ki kontinye e ki fè lamizè vin pi rèd nan peyi a, pa gen edikasyon, sèvis sosyo yo prèske pa egziste. Epi, gen nan yo ki jis ap chache pwoteksyon oubyen ap chache pou okipe fanmi yo, se pami rezon yo bay yo.
Yon lòt kote, òganis k ap defann dwa timoun yo montre nan Pòtoprens timoun yo ap mal viv. Se pou sa, yo soulinye 1.2 milyon timoun ap viv anba vyolans gang yo pandan 365 000 lòt twouve yo nan kan deplase. Pou sa ki gade vyolans ak agresyon seksyèl menm, yo di chif timoun ki ap sibi yo ane sa sèlman miltipliye pa 10.
Fas ak sitiyasyon sa, UNICEF mande fòs lòd yo ak tout gouvènman an pou garanti sekirite ak pwoteksyon pou timoun yo, pran mezi pou ti rès ki rete yo ak sa ki nan gang yo pa ansasinen oubyen blese. Anplis sa, li mande tou pou otorite yo al libere sa k nan gang yo pandan y ap remèt yo bay espesyalis pwoteksyon pou kapab foure yo ankò nan sosyete a pandan y ap jui tout dwa yo kòm timoun.
CP: Defap
Atik sa se pwopriyete prive ©️ Gwoup Medya MAGHAITI 2024
