Aprè entèdiksyon vòl entènasyonal yo sou peyi a semèn pase a, konpayi Sunrise Airways kòmanse reprann vòl li yo nan nò Ayiti depi ayè mèkredi 20 novanm 2024 la. Vòl sa vini aprè Administrasyon Federal Aviyasyon (FAA) te pran desizyon menm jou a pou te otorize vòl ki pral nan Nò peyi a espesyalman nan vil Okap.
Ayè mèkredi a yon vòl Sunrise Airways ki te sòti Etazini te efektivman ateri nan ayewopò entènasyonal Okap la. Nan vòl sa te genyen 73 pasaje.
Nan menm sans sa, konpayi a te anonse tou li gen 3 nouvo koneksyon ant Okap ak Sint Maarten, Panama epi Gwadloup. Li te soulinye koneksyon sa yo la pou jou 30 novanm k ap vini la, annatandan yo anonse lè tout bagay ap antre nan lòd pou yo ka retounen vwayaje sou Pòtoprens ankò.
N ap raple, nan dat madi 12 novanm nan Administrasyon Federal Aviyasyon te entèdi pou 30 jou kèlkeswa avyon k ap sòti nan entènasyonal la pou te vwayaje vin Ayiti. Desizyon sa te pran akoz vyolans lan ki te fè 3 avyon te resevwa plizyè bal pandan yo ta pral ateri nan ayewopò entènasyonal Tousen Louvèti a nan lendi ki te 11 novanm nan.
© Tous droits réservés – Groupe Média MAGHAITI 2024
