Sendika Polisye Nasyonal Ayisyen yo (SPNH-17) nan yon nòt pou laprès denonse yon konplo li di k ap fèt pou destabilize Polis Nasyonal Ayiti a (PNH).
Nan kominike sa li pibliye ayè vandredi 31 janvye 2025 lan, sendika lapolis la pa sèlman denonse konplo k ap fèt pou febli enstitisyon polisyè a, men tou li denonse mannèv k ap fèt pou livre bay gang yo rès kapital la. Anplis, SPNH-17 di li remake ak kè sere jan zak ki sot fèt nan Kenskòf la se yon tantativ pou kraze estrikti sekirite Lwès 1 ak Lwès 2 a epi louvri chemen pou bandi pran kontwòl Dèlma ak Petyonvil.
Yon lòt kote, sendika a presize tout sa ki gen pou wè ak sekirite peyi a se responsablite Konsèy Siperyè Lapolis Nasyonal la (CSPN). Li gen ladan l Premye minis lan kòm prezidan, minis jistis lan ki se vis prezidan, minis enteryè a ki li menm se 2yèm vis prezidan epi direktè jeneral lapolis la ak Enspeksyon Jeneral anchèf yo ki youn aprè lòt se sekretè jeneral ak sekretè egzekitif adjwen.
Toutfwa, sendika lapolis la fè konnen masak ki pase nan Kenskòf la te ka evite si polisye yo te gen bon materyèl. Pami yo elikoptè, machin ki reponn ak teren difisil sa epi pou ranfòse ransèyman ak entèlijans operatif yo.
SPNH-17 pwofite nòt sa pou l mande CSPN nan ak tout otorite ki responsab sekirite peyi a pou yo mete tout dispozisyon nesesè pou konplo kont PNH la pa abouti.
Atik sa se pwopriyete prive ©️ Gwoup Medya MAGHAITI 2025
