Aprè pòt pawòl Polis Nasyonal Ayiti (PNH) a, Michel-Ange Louis Jeune fin anonse ayè vandredi a arestasyon 3 polisye, Sendika Polis Nasyonal Ayiti (SPNH-17) a di li kwè genyen gwo pase men ki dwe fèt anndan enstitisyon polisyè a. Reyaksyon sa vini aprè arestasyon ajan sa yo ki te ak gang gwo Fanfan ki li menm tonbe anba bal Lapolis.
Sendika lapolis la ki sanble preyokipe akoz non divès polisye site nan gang, panse li se yon nesesite pou gen chanjman ki fèt nan PNH la.
Daprè sendika a, direktè jeneral enstitisyon an, Normil Rameau genyen chwa pou l fè. Sa ki vle di li ka chwazi echwe osnon reyisi ak polisye onèt yo. Pou sa, SPNH-17 di li kwè nimewo 1 PNH la dwe retire tout polisye kowonpi yo menm si yo ta gen nenpòt grad la.
Dènye tan sa yo, non polisye ki gen alyans ak gang pa sispann site nan peyi a. Se yon zak selon divès òganizasyon dwa moun ki tankou yon pwa ki kapab enpeche lapolis la mennen bon jan operasyon kont gang yo.
sa se pwopriyete prive ©️ Gwoup Medya MAGHAITI 2024
