Sendika Polis Nasyonal Ayisyen yo (SPNH-17) atravè yon nòt li rann piblik ayè dimanch 16 fevriye 2025 lan, di li konstate Konsèy Prezidansyèl Tranzisyon an (KPT) ak Konsèy Siperyè Polis Nasyonal la (CSPN) poko deside tout bon vre pou mete yon bout nan ensekirite a.
Nòt sa ki sòti menm jou bandi yo atake pou yon lòt fwa komin Kenskòf lan, konsidere gen yon sitiyasyon kritik nan peyi a e malgre sa otorite yo poko bay fòs lòd yo ak lame a mwayen nesesè pou reprann lanmè, espas anlè a, fwontyè ak teritwa ki pèdi yo.
Sendika lapolis la ki kontinye ap denonse fason dirijan yo pa fè anyen pou konbat fenomèn ensekirite a, di li bay otorite yo jiska 12 mas 2025 pou bay siy klè peyi a sou chimen sekirite. «Si pa gen bon jan aksyon ki poze, n ap konsidere yo lage popilasyon an ak polisye yo nan men kriminèl yo», se sa SPNH deklare.
Pou konbat zak vyolans sa yo, SPNH-17 mande manm yo nan KPT a ak gouvènman ayisyen an pou adopte yon seri mezi, tankou dekrete eta ijans sekiritè sou tout teritwa a epi sispann tout aktivite ki pa nesesè tankou kanaval ak lòt festivite yo. Yon lòt kote, li mande pou responsab yo konvoke tout polisye, sitou sila yo ki te travay ak ansyen fonksyonè epi ki laba, pou mete yo disponib nan 2 jou jiska nouvèl lòd.
Anplis, responsab yo nan sendika a swete otorite yo debloke fon pou operasyon sekirite yo. Li presize lajan sa dwe pou enfòmasyon, prim risk, ak manje pou polisye ki sou teren an. Li kwè tou, yo dwe mete inite swen ak anbilans nan chak zòn kote operasyon yo ap fèt pou ka ede polisye ak militè ki ta viktim pandan entèvansyon yo.
Aprè ansanm pwopozisyon sa yo SPNH la fè Konsèy Prezidansyèl la ak gouvènman an, li di li kwè li nesesè pou yo reoganize lapolis la. Daprè eksplikasyon l bay, sa ap fèt nan retire mayon ki pa efikas yo, tankou nan DCPA, DCPJ, komisarya ak kèk inite ki pa reponn ak bezwen sekirite yo. Menm kote a, li soulinye yo dwe mete responsab ki kapab pran bon desizyon epi akonpaye polisye ki sou teren yo.
Atik sa se pwopriyete prive © Gwoup Medya MAGHAITI 2025
