Konpayi ayeryen Spirit Airlines anonse jodi lendi 18 novanm 2024 la li gen gwo pwoblèm lajan. Men, daprè Miami Herald tout vòl konpayi sa ap toujou kontinye fèt.
«Nou ka kontinye rezève epi vwayaje kounye a oubyen nan tan k ap vini yo. Spirit prevwa kontinye aktivite li yo menm jan sa konn deja tout pandan pwosesis sa a», selon deklarasyon konpayi a jounal ameriken an rapòte.
Miami Herald fè konnen tout dokiman ki pale sou dosye sa te depoze jodi a menm nan yon tribinal nan New York. Yo eksplike, sitiyasyon sa vini aprè konpayi a echwe plizyè fwa nan lide pou te yon sèl ansanm ak Frontier Airlines epi JetBlue. Nan menm dosye sa a jounal la soulinye genyen demach k ap fèt pou ta gen restriktirasyon tou.
Spirit Airlines gen plis pase 21 000 travayè ladan l, poutan yo fè konprann tout anplwaye yo ap toujou touche nòmalman.
Pou sa ki gade akò li te dwe genyen ak Jetblue a, anpil nan teavayè yo ak plizyè estrikti tankou Asosiyasyon of Flight Attendants epi Aircraft Mechanics Fraternal Association pa t kontan dèske konpayi a pa t fè yon sèl ak Jetblue. Se jij William G. Young ki te bloke pwosesis la nan mwa janvye 2024 la. Desizyon sa te vini paske administrasyon Biden nan pa t vle sa, puiske yo te estime pa t ap gen konkirans nan mitan 2 konpayi ayeryen yo ankò, epi vwayajè yo ta pral nan kouri akoz vòl yo ta pral vin pi chè san twòp opsyon.
Atik sa se pwopriyete prive ©️ Gwoup Medya MAGHAITI 2024
