Nan kad 16 jou aktivis k ap fèt kont vyolans sou fanm ak tifi ane sa, Solidarite Fanm Ayisyen Jounalis (SOFEHJ) te rive reyalize 2 jounen fòmasyon pou fanm jounalis yo nan Otèl Montana 5 ak 6 desanm 2024 la. Aktivite sa te fèt nan tèt kole ak UNESCO anba tèm «Medya yo kòm zouti pou plede ak ede viktim vyolans sou jan».
Sòti 5 pou te rive 6 desanm nan anviwon 20 jounalis fanm te rive resevwa fòmasyon sa. Nan premye jou a, pwofesyonèl laprès sa yo te gen chans konnen divès konsèp ki gen rapò ak Vyolans sou Jan (VBG) gras ak youn nan panelis yo, Jéruscha Vasti Michel. Konsa, yo te rive konnen kòman pou yo fè plis bri epi kontribye nan elimine vyolans medam yo ap sibi yo.
Panche sou twomatis yo san okenn diskriminasyon, bay lapawòl ak viktim yo, bon jan apwoch bò kote viktim VBG yo, se nan demach sa patisipan yo te rive reyalize epi prezante plizyè travay. Aprè etap sa, yo te rive analize ansanm divès ka yo te trete nan repòtaj yo te reyalize yo.
Pou sa ki gade 2yèm jounen an, jounalis sa yo te jwenn bourad nan kesyon responsabilite medya yo nan pale sijè sou VBG gras ak entèvansyon kòdonatris SOFEHJ la, Martine Isaac. Nan yon lòt tan, Vanessa St Val ansanm ak Violine Thelusma ki se responsab kominikasyon UNESCO te kontinye youn aprè lòt pou te pale sou lidèchip, ranfòsman patisipasyon fanm jounalis nan lavi piblik epi Edikasyon Medya yo ak Enfòmasyon (EMI) yo.
Nan deklarasyon patisipan yo, yo fè konnen se te 2 jounen kote yo te aprann anpil, e pwomèt yo pral kontinye travay yon fason pou elimine vyolans sou jan fanm ak tifi ak sibi an Ayiti.
«Mwen deja wè mwen ki ap sansibilize lòt jèn sou VBG paske anpil fanm lè yo sibi vyolans keseswa fizik, sikolojik, seksyèl yo pa vle pale yo pè pou moun pa jije yo, e yo pa menm vle ale nan enstans ki kapab akonpanye yo pou sa», daprè jounalis Angy Desravines. Pou fini, li di li swete louvri yon espas nan emisyon l anfavè viktim yo, puiske li fè konprann fòmasyon sa te benefik pou li.
Atik sa se pwopriyete prive ©️ Gwoup Medya MAGHAITI 2024
