Grèv platfòm sendika anseyan lekòl piblik yo te lanse sou 10 depatman peyi a finalman leve ayè lendi 20 janvye 2024 la. Desizyon pou kanpe grèv la vini aprè yon antant responsab yo nan Ministè Edikasyon ak Fòmasyon Pwofesyonèl (MENFP) jwenn ak platfòm sendika yo.
Grèv anseyan sa yo te lanse nan tout peyi a nan dat 6 janvye pase a kote yo t ap mande pi bon kondisyon travay. Antant ki rive jwenn lan fèt aprè sendikalis yo fin fè 5 jou nan negosiyasyon ak chèf gouvènman ayisyen an, Alix Didier Fils-Aimé, Minis Ekonomi ak Finans lan, Alfred Metellus ak Minis Edikasyon an, Antoine Augustin.
Daprè MENFP, se yon antant ki rive posib akoz tou 2 pati yo siyen yon akò angajman ki ranmase yon seri pwen esansyèl ki nan kaye doleyans sendika yo. Kote gouvènman an pran dispozisyon pou l satisfè yo nan pa twò lontan.
Pami pwen otorite yo nan Ministè a pran angajman pou respekte nan kad siyati akò sa nou jwenn : Kontinye epi ranfòse operasyon k ap fèt pou regilarize, nan yon ti tan, sitiyasyon anseyan k ap travay san yo pa touche oubyen k ap travay san yo pa gen lèt nominasyon yo, trete dosye dèt Ministè a genyen pou anseyan yo (aryere salè), epi bay anseyan ak pèsonèl MENFP yo yon Kat debi 15,000.00 goud apati fevriye 2025.
Bò kote pa Premye minis lan, li felisite sendikalis yo pou detèminasyon yo montre nan batay pou amelyore fonksyonman lekòl piblik yo. An menm tan, li di tou li rekonèt revandikasyon anseyan yo jis e li bay garanti l ap respekte tout pwomès li yo paske li fè konnen li pwomèt sa li ka bay.
Atik sa se pwopriyete prive ©️ Gwoup Medya MAGHAITI 2025
