Aprè tout pale anpil eleksyon ki te fèt nan dat 23 jiyè 2024 la e ki te bout ak Yves Marie Édouard la, finalman sektè fanm nan anonse yon lòt moun ki pra l gen pou reprezante yo nan KEP a.
Divès òganizasyon fanm tankou Kay fanm, Solidarite Fanm Ayisyen (Sofa), Kri fanm Ayiti (Krifa), Fondasyon Toya ak Federasyon Òganizasyon Fanm pou Egalite Dwa Moun (Fedofedh), anonse jounen mèkredi 28 dawout 2024 la, se Marie Rébecca Guillaume ki pral reprezante yo. Desizyon sa vini aprè eleksyon yo te fè lendi ki te 26 dawout la, kote madanm Guillaume jwenn 5 vòt devan Ercarma Joassaint ki li menm fè 4 vòt. Epitou genyen 3 lòt kandida youn ladan yo fè yon vòt epi lòt 2 yo pa t genyen ditou.
Nan pwozesis pou te mennen ak eleksyon sa te genyen 5 kandida ak 116 òganizasyon. Pami 116 òganizasyon sa yo, genyen 82 ladan yo ki te respekte dat pou enskri yo epi rès 43 yo te fè demach yo aprè dat ki te bay pou sa.
Daprè reprezantan Kay fanm nan, Daniel Magloire, genyen sèlman 22 òganizasyon ki te apwouve pou patisipe nan eleksyon yo.
O total se 14 òganizasyon ki te vote nan eleksyon sa. 12 pami yo te vote anliy pwiske pwosesis la te fèt sou entènèt ak an prezans. Selon feminis lan, gen youn nan òganizasyon ki te valide yo ki pa t patisipe nan eleksyon yo. Daprè li menm se akoz estrikti a te vini aprè vòt yo e nan moman yo te fin siyen.
Daniel Magloire soulinye seyans lan te dewoule anba kontwòl prezidan Asosyasyon Bawo Pòtoprens lan, Me Patrick Pierre-Louis. Pandantan sa, li fè konnen komite a te sibi anpil presyon pandan pwosesis lan. E li fè kwè òganizatè yo kwè se akoz kritè yo te mete pou sa yo te gen presyon an.
N ap raple, eleksyon divès òganizasyon fanm te jije fèt nan magouy la, se òganizasyon Dyalòg Entèfanm (DIFE) Pedrica Saint-Jean ap dirije ki te òganize l. Se nan eleksyon sa Yves Marie Édouard te sòti kòm reprezantan sektè fanm yo nan KEP a.
Atik sa se pwopriyete prive ©️ Gwoup Medya MAGHAITI 2024
