Kantite moun ki mouri nan masak gang yo te fè nan Ponsonde a sòti 70 li pase a 115 viktim daprè sa majistra zòn nan, Myriam Fièvre fè konnen.
Pandan premye bilan Rezo Nasyonal k ap Defann Dwa Moun (RNDDH) yo te mansyone plis pase 70 viktim nan atak gang baz « Gran Grif » la te fè jedi 3 oktòb 2024 la nan Ponsonde, jodi jedi 10 oktòb la majistra vil Senmak la, Myriam Fièvre fè konnen nouvo bilan yo revele se plis pase 115 moun ki mouri.
Touswit aprè masak sa, chèf gouvènman an, Garry Conille te fè yon kout pye nan Ponsonde yon mannyè pou te asiste viktim yo. Anplis sa plizyè Inite nan lapolis la te deplwaye tou yon fason pou bay yon repons ak gang yo. Men, 8 jou aprè masak sa a pa gen okenn bilan sou operasyon ki ta fèt nan zòn nan.
N ap raple, nan moman atak sa bandi yo te pase plizyè kay anba flanm dife. E plizyè moun te sòti blese. Fòk nou di tou, 8 jou aprè gang yo pa pran tan pou te fè lòt atak puiske jodi jedi a menm gwoup gang Kanaran an te atake vil Akayè kote popilasyon an pa sispann lanse SOS pou fòs lòd yo avan pita pi tris.
Atik sa se pwopriyete prive ©️ Gwoup Medya MAGHAITI 2024
