Rezo Nasyonal Pou Defann Dwa Moun nan (RNDDH) mande pi wo nan leta yo pou refize lajan y ap touche ki la pou sèvis entelijans peyi a. Òganis la fè demann sa nan nouvo rapò li pibliye jodi vandredi 4 oktòb 2024 la, sou bilan moun ki viktim nan masak Ponsonde a.
Selon sa yo fè konprann, lajan sa lokatè primati a ak tout manm Konsèy Prezidansyèl Tranzisyon an ap touche a pa itil peyi a anyen. Puiske, yo soulinye sèvis entelijans peyi a pa gen okenn amelyorasyon ladan l paske lajan sa yo pa itilize pou fè travay la vre.
«RNDDH kwè si lajan ki nan sèvis entelijans diferan estrikti etatik nou site la yo te byen itilize, nou te ka evite masak Ponsonde a. Paske te gen rimè ki t ap kouri sou planifikasyon masak sa depi plis pase 2 mwa», se pozisyon enstans k ap defann dwa moun nan.
Sou pwen sa, yo denonse otorite nan leta yo ki neglije sèvis entelijans lapolis la ki daprè yo, sèlman 3 milyon goud. Tandiske, konseye yo yo menm ansanm ak 2 manm obsèvatè yo yo chak ap touche 5 milyon goud.
Nan sans sa, RNDDH deklare li lè li tan pou enstans tankou laprimati epi Ministè Jistis ak Sekirite Piblik sispann ak ekri nòt chak lè pou kondane vyolans gang yo nan peyi a. Paske yo di yo rete kwè se pa plede sòti nòt pou denonse zak bandi yo ki pral fè sekirite tabli kò li nan peyi a.
«RNDDH rekòmande KPT a ak laprimati pou renonse ak kòb yo ba yo pou sèvis entelijans yo ki pa vo anyen an pou yo bay enstitisyon polisyè a li pito», se sa estrikti k ap defann dwa moun nan mande ki pou fèt.
Atik sa se pwopriyete prive ©️ Gwoup Medya MAGHAITI 2024
