Kèk jou aprè Ayiti te fin antre nan Komisyon Reparasyon Kominote Karayib la (CARICOM), responsab yo bay idantite moun k ap reprezante Inivèsite leta Ayiti (ILA) a. Se pou sa, Rektora a li menm anonse ayè jedi 8 dawout 2024 la, yo chwazi rektè Fritz Deshommes pou jere gwoup travay ILA a sou sijè sa.
“Rektora Inivèsite leta Ayiti vle fè tout moun konnen sitou kominote inivèsite a, se Rektè Fritz Deshommes ki chwazi pou asire reprezantasyon Ayiti nan Komisyon Reparasyon CARICOM nan. L ap fè sa, nan non Gwoup Travay ILA a sou Restitisyon ak Reparasyon an”, daprè sa ki di nan nòt sa.
Pi lwen, yo fè kwè responsab yo nan ministè zafè etranjè te deja bay sinyal sa nan sekretarya jeneral CARICOM nan depi 5 dawout ki sot pase la. Bò kote pa yo, Rektora a soulinye kontantman yo pa rapò ak tip travay sa yo ki selon yo menm, se yon bon desizyon pou nasyon ayisyen an.
Yon lòt kote, yo kontinye pou di: “Pou yon premye fwa, Ayiti pral chita nan Komisyon Reparasyon CARICOM nan“. Nan sans sa nan nòt la Rektora a, li pwofite felisite chak moun ki fè pati manm komisyon an pou angajman yo, patriyotis yo ak sans responsablite yo.
N ap raple, aksyon sa se rezilta patisipasyon Ayiti nan 47yèm reyinyon òdinè konferans chèf leta ak gouvènman peyi manm CARICOM yo. Kote minis zafè etranjè a, Dominique Dupuy ak Prezidan Konsèy Prezidansyèl Tranzisyon an, Edgard Leblanc Fils te prezan pou te diskite pou peyi a.
Atik sa se pwopriyete prive ©️ Gwoup Medya MAGHAITI 2024
