Konseye prezidansyèl Leslie Voltaire pran gwo imilyasyon ayè lendi 23 septanm 2024 la, nan Nouyòk. Sa rive nan moman yon rankont ofisyèl ki te genyen ant Premye minis Ayisyen an, Garry Conille ak prezidan brezilyen an, Luiz Inácio Lula da Silva.
Daprè sa Radyo Scoop rapòte, Leslie Voltaire manm pwotokòl la te anpeche l antre nan rankont sa a paske l te prezante tèt li tankou prezidan Ayiti. Alòske, non l pa t menm parèt nan lis ofisyèl envite yo, se te pito non prezidan Konsèy la Edgard Leblanc Fils ki te nan lis.
Aprè aksyon sa fin fèt, medya a rakonte se direktè jeneral Televizyon Nasyonal Ayiti (TNH) a ki t al tante pwouve mesye Voltaire se youn nan konseye prezidansyèl yo. Responsab televizyon leta a se sou «google» li t al chache montre manm pwotokòl brezilyen an Leslie Voltaire fè pati laprezidans, men sa ki pa t mache pwiske yo te fè konnen peyi yo toujou genyen yon sèl prezidan.
Sitiyasyon sa te lakoz gwo konsekans tankou fè yo mete deyò nan sal la responsab TNH la. puiske l t al eseye pwouve kiyès konseye Leslie Voltaire ye.
© Tous droits réservés – Groupe Média MAGHAITI 2024
