Nan diskou li fè jodi jedi 26 septanm 2024 la, Prezidan Konsèy Tranzisyon an, Edgar Leblanc Fils fè konnen li lè li tan pou Ayiti jwenn jistis ak reparasyon nan men peyi ki te fè l mal yo, pami yo Lafrans. Manm gouvènman an fè deklarasyon sa a nan okazyon 79yèm asanble jeneral Òganizasyon Nasyonzini (ONU) k ap fèt aktyèlman Etazini.
«Fò m raple nou Ayiti se sèl peyi yo te fè peye pou endepandans li te pran nan dife ak san. Pandan bisantenè evènman sa a nan mond lan pral rive a, èske lè a pa sonnen pou Ayiti jwenn lajan sa yo li te peye a», se pawòl sa yo prezidan KPT a te deklare devan tribin Nasyonzini an. Pandan li soulinye se peyi sa yo menm ki kenbe devlopman Ayiti.
Nan diskou li a, nimewo 1 Konsèy tranzisyon an pa t mete dlo nan bouch li pou kritike Lafrans pou dèt endepandans la. “Dèt sa te souse tout ekonomi peyi a sa ki fè nou plonje nan povrete jouskaprezan. Dèt sa a, se te yon fòm pinisyon dèske yo te vle fè nou peye frekansite nou paske nou te sòti nan esklavaj. Li te kenbe tou nan kou potansyèl ekonomik sosyàl pèp nwa ayisyen an pandan plizyè jenerasyon”.
Nan sans sa a, li te pwofite mansyone konbyen antite ak gouvènman ki ap diskite sou nesesite pou peyi a jwenn jistis, ak reparasyon pou tout dèt peyi oksidantal yo dwe.
Yon lòt kote, politisyen an te salye kouraj chak grenn ayisyen ki al pran refij nan lòt peyi, e swete yo tounen lè sa bon. Li te voye solidarite l tou pou tout imigran k ap viv Etazini espesyalman nan vil Springfield yo, ki ap viv move moman akoz manti Repibliken yo ap fè sou do yo
N ap fè konnen, prezidan Edgar Leblanc Fils te atire atansyon manm Nasyonzini yo sou sitiyasyon Ayiti a. Kote li fè yo konprann nan moman sa li plis pase enpòtan pou yo ede nan mete lapè ak sekirite. Epi reponn ak bezwen imanitè ki genyen nan sosyete a.
«Ayiti tè sa ki te ofri mond lan senbòl libète ki pap janm fayi e ki te ede plizyè nasyon retire tèt yo anba move peryòd kolonyalis la, pap chache charite, men l ap chache jistis respè pou diyite, epi dwa pou l genyen yon bon egzistans ki sanble l», se sou nòt sa Edgar Leblanc Fils te fini ak diskou l nan gwo rasanbleman entènasyonal sa a.
© Tous droits réservés – Groupe Média MAGHAITI 2024
