Prezidan Konsèy Prezidansyèl Tranzisyon (KPT), Edgard Leblanc Fils anonse ayè jedi 26 septanm 2024 la, Ayiti pral siyen akò sou biyodivèsite marinn yo. Se nan kad 79yèm asanble jeneral Nasyonzini an Prezidan Konsèy la fè anons sa.
Konseye prezidansyèl la, nan diskou l sou tribin Nasyonzini an fè konnen Ayiti deside pou l kolabore ak kominote entènasyonal la. Se yon fason pou l asire akò sa pral fèt nan enterè tout limanite, pandan l ap patisipe nan pwoteksyon ekosistèm maren yo.
Daprè sa Edgard Leblanc Fils deklare defi mondyal sa yo ka sispann sèlman ak yon angajman ki renouvle an favè miltilateralis, solidarite ak aksyon kolektiv la. «Malgre difikilte l, Ayiti pare pou l kolabore ak kominote entènasyonal la pou li fè fas ak kriz li yo epi bati yon avni nan lapè, lajistis epi pou diyite moun kapab triyonfe », se sa li fè konnen sou tribin nan. Pandan li pa t neglije soulinye travay sa pap ka rive ak yon sèl moun men nan tèt kole puiske, li di nou dwe aji pou nou gen garanti pyès moun pa rete sou kote.
Akò sa te antre an aplikasyon 19 jen 2023 pase a. Li gen pou objektif garanti pwoteksyon biyodivèsite marinn yo, ankouraje eksplwatasyon dirab, resous marinn yo ak ranfòse rezilyans eta ki gen zile yo tankou Ayiti fas ak defi ki genyen nan chanjman klimatik la.
Atik sa se pwopriyete prive ©️ Gwoup Medya MAGHAITI 2024
