Nan yon kout videyo ki pibliye sou paj laprezidans jodi madi 24 desanm 2024 la, Prezidan Konsèy la, Leslie Voltaire pwomèt popilasyon an atak bandi yo kont lopital Jeneral la pap rete san konsekans. An menm tan, nimewo 1 Konsèy la te pwofite voye senpati l bay tout fanmi viktim yo, asosiyasyon jounalis yo, ak lapolis.
«Nou garanti yo zak sa pap rete san konsekans», se deklarasyon prezidan Konsèy Prezidansyèl Tranzisyon an (KPT), Leslie Voltaire. Pi lwen, nan non konsèy la li pwofite kondane zak malonèt sa bandi yo fè a ki, selon li menm, pa akseptab ditou.
Pou kounye a, atak sa bandi yo fè a lakoz 2 jounalis ak yon polisye mouri anplis 9 lòt ki sòti blese anba bal, pami yo 2 polisye. Mackendy Natoux ak Jimmy Jean se non 2 jounalis sa yo ki pèdi lavi yo a, yo t ap travay youn aprè lòt nan sèvis kominikasyon VOA, ak medya anliy Moun Afe Bon TV. Epi Daniel Renaud se non polisye ki mouri a.
N ap soulinye, pou moman sa jounalis ak polisye ki blese yo ap pran swen nan lopital lapè ki nan Dèlma 33. Puiske, anndan lopital Jeneral kote yo te ye a pa t gen okenn pèsonèl sante pou te ba yo premye swen menmsi minis sante a, Duckenson Lorthe Blema ta pral fè seremoni reouvèti lopital la.
Atik sa se pwopriyete prive © Gwoup Medya MAGHAITI 2024
