Nan yon adrès li fè pou nasyon an nan lannuit dimanch 6 oktòb 2024 la, Prezidan Konsèy tranzisyon an, Edgar Leblanc Fils deklare li pap patisipe nan anyen ki ap antrave travay lajistis nan peyi a. Li fè deklarasyon sa a, pou eksplike rezon ki fè li pa t siyen yon rezolisyon ki pran nan mitan Konsèy la vandredi ki sot pase a.
«Mwen menm ki vle respekte enstitisyon ak lalwa peyi a, nan sousi pou pwoteje imaj Konsèy Prezidansyèl la epi rete konyeran ak sa m te di deja mwen pa kapab aksepte patisipe nan okenn demach ki ap afebli pi plis epi devalorize lajistis peyi a», se pawòl sa yo nimewo 1 Konsèy la pwononse akoz li pa dakò mare sosis li ak 3 konseye ki enplike nan dosye koripsyon Inite Lit Kont Koripsyon (ULCC) jwenn sou do yo a.
Rezolisyon sa ki gen siyati 6 konseye san pa prezidan Konsèy la, se yon akò ki bay Emmanuel Vertilaire, Louis Gérald Gilles ak Smith Augustin dwa pou yo toujou nan Konsèy la malgre yo enplike nan dosye 100 milyon goud Bank Nasyonal Kredi a (BNC). Se sa k fè Edgar tou avèti pèp la wout Konsèy la ap pran an pap bon pou peyi a. Paske, selon li menm, nan faz Konsèy la antre a la li posib pou fè peyi a tonbe nan enstabilite. Sa ki ka rann pi mal sitiyasyon Ayiti, epi pwolonje peryòd tranzisyon an.
Daprè deklarasyon Edgar yo, antanke prezidan Konsèy la li te vle pou konseye prezidansyèl Emmanuel Vertilaire, Louis Gérald Gilles ak Smith Augustin te rete lwen tout travay KPT a ap fè aprè rapò ankèt ULCC a. Poutan, nonsèlman misye Vertilaire ak doktè Gilles te deklare jounal le Nouvelliste klè kou dlo kòk yo pap demisyone, men yo toujou patisipe nan travay aktif Konsèy la sitou pou dosye “prezidans tounant” lan.
Pou kounye a, selon akò ki te bout ak Konsèy Prezidansyèl Tranzisyon (KPT) an nan peyi a, jodi lendi 7 oktòb 2024 la se dat pou Edgar Leblanc Fils ta kite plas li a pou konseye prezidansyèl Leslie Voltaire. Se nan sans sa menm laprezidans peyi a nan yon nòt yo rann piblik, yo bay laprès randevou jodi a menm nan Vila akèy la pou seremoni enstalasyon nouvo prezidan Konsèy la.
Atik sa se pwopriyete prive ©️ Gwoup Medya MAGHAITI 2024
