Nan yon videyo ki ap sikile sou rezo sosyàl yo jodi mèkredi 20 novanm 2024 la, Prezidan fransè a, Emmanuel Macron kritike devan tout moun Konsèy Prezidansyèl Tranzisyon an (KPT) dèske li te deside revoke Garry Conille kòm Premye minis Ayiti.
«Premye minis lan te bon, m te defann li, yo mete l deyò. Se yon bagay tèrib», se sa nimewo 1 Lafrans lan deklare yon sitwayen ki petèt te mande l yon reyaksyon. Menmsi li pa fè pyès pèsonalite, men pawòl li yo fè konprann aktè politik sa yo ki nan KPT a pa t dwe janm pran yon desizyon konsa puiske ansyen PM Garry Conille t ap fè yon bon travay, daprè li menm.
Chèf leta fransè a pa t bliye akize tou Ayisyen. Puiske, li estime li menm li pa t ap ka fè anyen, anplis selon li menm, se sèl yo ki responsab sitiyasyon ensekirite k ap vale teren an Ayiti a. Se pou sa li di : «se Ayisyen ki mete Ayiti la, paske yo kite nakotrafik la».
N ap soulinye, plis pase 24è aprè bandi t ap eseye anvayi Petyonvil ak zòn sou touprè l yo kote popilasyon an ak lapolis te kenbe epi touye plizyè nan yo, ni Prezidan Konsèy la, Leslie Voltaire ni laprezidans ni nouvo chèf gouvènman an, Alix Didier Fils-Aimé pa di yon mo sou sitiyasyon an. Poutan, lari Pòtoprens toujou gen menm van ensekirite a k ap soufle sou li, kote divès aktivite ak transpò machin prèske paralize.
CP: Sud Ouest
Atik sa se pwopriyete prive ©️ Gwoup Medya MAGHAITI 2024
