Chèf gouvènman ayisyen an, Garry Conille anonse jodi samdi 14 septanm 2024 la, pwoteksyon sivil deja ap opere ak kèk enstitisyon leta pou ede viktim eksplozyon nan Miragwàn yo. Pandan tan sa, premye minis lan eksprime tout lapèn li aprè gwo eksplozyon sa ki lakoz anviwon 17 moun mouri nan zòn Nip la.
“Mwen regrèt anpil eksplozyon kamyon sitèn gaz la ki rive Miragwàn jodi a“, daprè sa premye minis lan deklare nan yon pòs li fè sou kont X li. Yon kote, li fè konnen li deja pale ak otorite lokal yo nan Nip la, epi fè kou li konnen pou te mobilize responsab pwoteksyon sivil (DGPC) sante piblik, afè sosyal pou sove lavi moun ki boule grav yo.
Selon chif pwovizwa Direksyon Jeneral Pwoteksyon Sivil (DGPC) li site, responsab yo rive resanse 40 moun ki boule grav.
Yon lòt kote, li te tou pwofite anonse DGPC te aktive Sant Operasyon Ijans Depatmantal (COUD) nan Miragwàn pou te mete kontwòl sou operasyon y ap mennen yo. Se pou sa, nan moman sa menm li fè kwè genyen 16 moun ki twouve yo nan lopital Sen Bonifas Fondèblan, epi 5 lòt nan lopital Imakile Konsepsyon nan vil Okay.
Pou kounye a, chèf primati a soulinye deja genyen 4 anbilans pou kontinye ak operasyon pou retire moun yo nan danje. E li menm fè konnen nan yon ti tan tou kout pral gen yon vòl espesyal ki pou pran viktim vini ak yo nan lakou Pòtoprens. Daprè sa li ekri, inisyativ sa se laprimati ki pran li nan tèt kole avèk Ministè Sante Piblik ak Popilasyon epi Medsen San Fwontyè (MSF).
“Gouvènman an fè solidarite ak tout viktim yo e fanmi yo“, se sa premye minis la pwomèt nan sitiyasyon difisil sa. Kote gen 17 moun ki mouri epi anviwon 40 lòt boule aprè eksplozyon yon kamyon sitèn ki te gen gaz nan Miragwàn .
Atik sa se pwopriyete prive ©️ Gwoup Medya MAGHAITI 2024
