Nan lannuit madi 10 pou rive jodi mekrèdi 11 desanm 2024 la, pou pi piti 20 manm nan popilasyon Ti Rivyè Latibonit la jwenn lanmò yo nan yon masak gang gran grif fè sou yo. Selon plizyè medya lokal, pami viktim yo genyen anpil timoun ki pèdi lavi yo.
Daprè plizyè temwen, kò viktim yo gaye sitou nan zòn bò Lise Henry Christophe la. E tou genyen plizyè videyo ki montre fason moun sa yo pèdi lavi yo anba men gwoup gang sa a.
Pandantan sa, plizyè moun ki ap viv nan Ti Rivyè Latibonit aktyèlman oblije ap kite zòn nan paske yo estime lavi yo menase. Fòk nou di, tout aksyon sa yo pase kèk jou aprè lapolis ak fòs miltinasyonal la te anonse yo reprann kontwòl komisarya nan zòn sa a.
N ap soulinye, ayè madi a popilasyon nan Latibonit la te rive kenbe epi boule anviwon 8 bandi yo te rive met men sou yo.
Atik sa se pwopriyete prive ©️ Gwoup Medya MAGHAITI 2024
