Nan yon kominike ki pibliye ayè mèkredi 20 novanm 2024 la, Wo Komisarya Nasyonzini pou dwa moun nan (HCDH) fè konnen gen pou pi piti 150 moun ki mouri pandan semèn ki sot pase a. Se sa ki fè, Wo komisè a, Volker Türk deklare vyolans gang yo dwe sispann an Ayiti.
Anplis moun sa yo ki mouri a, genyen anviwon 20 000 lòt ki te oblije kite zòn yo tou pandan menm peryòd la. Selon HCDH, pou pi piti 55 % nan lanmò sa yo se atak gang yo ak afwontman yo konn gen ak lapolis ki lakoz yo.
«4 milyon abitan Pòtoprens yo prèske nan prizon, paske gang yo kounye a la kontwole tout wout prensipal yo ki antre ak sòti nan kapital la. Dènye monte vyolans lan nan kapital ayisyen an se yon siy evènman pi mal k ap vini yo. Vyolans gang yo dwe sispann prese prese», se deklarasyon defansè dwa moun nan ki pi devan, kontinye pou di kominote entènasyonal la paka kite Ayiti nan plonje nan sitiyasyon difisil sa toujou.
Nan dat 11 novanm nan menm, òganis lan fè kwè kòm bilan depi antre ane 2024 la genyen 4 544 moun ki pèdi lavi yo, 2 060 lòt te sòti blese. Mete sou sa, nan peryòd sa genyen 700 000 ki te kouri pou bandi, mwatye nan chif sa se timoun, toujou daprè òganis entènasyonal la.
Pandantan sa, yo soulinye tout vyolans sa sou popilasyon an pa san konsekans. Puiske aktyèlman, genyen rate dlo, maladi ki ap pwopaje nan mitan moun yo sitou sila ki nan kan deplase yo, ak menas kont lavi travayè imanitè yo.
Fas ak tout sa yo, Wo Komisarya Nasyonzini pou dwa moun nan mande fòk gen mezi ki pran pou ranfòse kapasite lapolis la ak fòs miltinasyonal la. Sa ap fèt yon fason pou pwoteje pèp ayisyen an epi tabli lapè jan sa dwe fèt la.
CP: Outre-mer la 1ère-Franceinfo
© Tous droits réservés – Groupe Média MAGHAITI 2024
