Menm jan yo te anonse l nan yon kominike yo te pibliye pandan jou pase yo, jodi mèkredi 27 novanm 2024 la, Post Canada montre tout moun foto ekriven Dany Laferrière yo mete sou tenb. Efektivman, zèv rekonesans sa te piblik nan lansman ofisyèl Salon du Livre Montréal ki fèt jodi a.
«Gras ak woman, pyès teyàt, powèm oswa esè moun yo, gwo non sa yo rive enspire epi klere lantèn abitan Kanada ak moun deyò yo», daprè sa Post Canada te ekri nan kominike li a ki t ap pale konsènan Dany Laferrière, Marie‑Claire Blais, Antonine Maillet ak Marguerite‑A. Primeau.
Dany Laferrière se yon ekriven Ayisyano Kanadyen ki fèt nan lane 1953. Li se akademisyen nan Akademi Fransè depi lane 2015. Li se otè plizyè liv tankou «L’odeur du café », «Comment faire l’amour avec un nègre», «Tout bouge autour de moi», «L’énigme du retour», «Autoportrait de Paris avec chat» et «Vers d’autres rives», pami liv sa yo li te rive pran plizyè pri pou yo.
Atik sa se pwopriyete prive ©️ Gwoup Medya MAGHAITI 2024
