Polisye Emmanuel Luma touye ayè dimanch 22 septanm 2024 la, madanm li Vania Duliette ak plizyè bal. Selon temwanyaj pitit fi viktim nan aprè l te fin touye manman l, polisye a te tou tire tèt li tou. Aksyon sa pase nan Okay espesyalman nan Koridò Boutèy.
“Li tire manman m bò kòt li, li bay Manman m premye bal la li wè l pa tonbe. Li ba l youn bò tete l, lè m rele anmwe li bay manman m yon twazyèm bal bò tèt li“, se pawòl sa yo pitit fi viktim nan, ki pote non Linda deklare avèk dlo nan je.
Nan eksplikasyon li yo, Linda fè konnen avan aksyon trajik sa te pase a prezime asasen an, ki touye tèt li tou, te nan diskisyon ak manman l jouskaske li te rive nan peze kou madanm nan. Li ajoute pou l di, Emmanuel te menm menase l l ap touye ak tout ti frè li ki te nan kay la jou dram nan pase nan vil Okay la.
Daprè lòt deklarasyon fanmi Vania fè, Emmanuel Luma alyas Manno te yon polisye e t ap travay nan Sou Direksyon Polis Jidisyè (SDPJ) ki nan vil Okay la. Pou kounye a selon pawòl ti frè madanm nan, lapolis te deja vin fè konsta. Men, li mansyone ajan sa yo te pwofite ale ak lajan yo te jwenn nan kay la.
Se yon aksyon fanmi an denonse paske yo fè konnen yo pa t prepare pou lanmò, kidonk yo pa gen mwayen pou antere madanm Vania Duliette.
N ap soulinye, se yon bann zak ki pa sispann repete nan sosyete ayisyen a. Kote avan sa te genyen tou Mike Fanm Yogann ak Djenica ki te sibi menm zak feminisid sa anba men mari yo.
© Tous droits réservés – Groupe Média MAGHAITI 2024
