Marckenzy Charles, se non jèn gason sa Direksyon Santral Polis Jidisyè (DCPJ) a mete anba kòd pou detansyon ilegal zam epi trafik zam ak katouch.
Jodi vandredi 23 dawout 2024 la, Lapolis Nasyonal Ayiti (PNH) anonse arestasyon Marckenzy Charles, ki se yon fonksyonè leta k ap travay nan antrepriz Piblik Pwomosyon Lojman Sosyal (EPPLS). Daprè enfòmasyon lapolis la, jèn gason 39 lane sa ta nan trafik zam epi genyen zam ak katouch ilegal, yo fè konnen yo arete sitwayen an nan Dèlma 31.
PNH la eskplike nan kad yon fouy li fè lakay akize a apre arestasyon an, li jwenn 1 500 dola ameriken, 39 250 goud, yon zam ak yon machin. Yo soulinye sispèk la paka bay ni pwouve nan ki fason li genyen materyèl sa yo.
Nan deklarasyon li, Marckenzy Charles eksplike machin nan pral gen 2 mwa nan men l se transfè a ki pot ko fèt. Tandiske, li pa t ka sonje non moun ki te vann li machin nan.
Sispèk la ki se yon mekanisyen paka bay sous zam ak katouch yo tou. Men, li fè konnen li te ranje yon machin pou yon zanmi nan plas kòb la li te ba li zam nan ak katouch kòm pèman. Li presize tou zanmi an te chwazi ba li zam nan se akòz fenomèn ensekirite a k ap taye banda anndan peyi a.
Pandantan sa, PNH la li menm li pwofite raple tout moun fason li detèmine pou konbat zak bandi yo, trafik zam ak katouch k ap fèt nan nan tout nivo nan peyi a.
Atik sa se pwopriyete prive ©️ Gwoup Medya MAGHAITI 2024
