Pwofesè lekòl piblik yo nan vil Jeremi manifeste jounen mèkredi 15 janvye 2025 lan pou mande yon pi bon kondisyon travay.
Plis pase yon dizèn pwofesè nan site Powèt la ki te kanpe travay depi plizyè jou pou egzije yon pi bon kondisyon foule beton an jounen mèkredi a. Anseyan lekòl piblik sa yo ap mande leta mete sou lajan yo, kreye bon jan kondisyon pou yo travay ak mete disponib kat debi a.
Nan yon premye tan, pwofesè sa yo pa kache kòlè yo pandan tout manifestasyon an pou denonse pwomès minis edikasyon an ki pa respekte. Nan yon lòt tan, yo mande pou genyen bon jan aksyon ki poze nan plas bèl pawòl yo.
Youn nan pwotestatè yo eksplike sal klas yo chaje ak elèv. Poutan pa menm gen materyèl, e li denonse lajan ya p touche a ki pa sifi pou reponn ak bezwen yo.
Mete sou kote pwofesè yo, plizyè dizèn elèv lekòl leta yo menm tou te desann nan lari a pou egzije prezans pwofesè nan sal klas yo. Daprè deklarasyon kèk nan yo fè, yo fè konnen egzamen yo di alòske yo pa gen anyen pou yo etidye. Yo eksplike se absans pwofesè yo nan sal yo ki lakoz depatman an ap bese nan pousantaj yo nan egzamen ofisyèl yo.
Yon lòt kote, elèv sa yo deklare si minis lan pa reponn ak revandikasyon pèsonèl edikasyon yo epi yo chwazi rete lakay yo se yo menm ki pra l pran otorite sa yo lakay yo.
Atik sa se pwopriyete prive ©️ Gwoup Medya MAGHAITI 2025
