Demen lendi 3 fevriye a anonse anpil tansyon nan peyi a kote gwoup gang kriminèl Viv ansanm yo te avèti y ap gen pou simen latwoublay nan peyi a. Fas ak menas bandi sa yo, plizyè lekòl nan kapital peyi a pran desizyon pou fèmen pòt yo pandan jounen an.
Se ka pa “Institution Saint-Louis de Gonzague” ki nan yon nòt enfòme pwofesè yo, elèv yo ak paran yo pòt yo ap rete fèmen pandan jounen 3 fevriye a. Se menm jan an tou pou “Grand Collège Bilingue de Sarthe” ki pran desizyon pou pa travay nan jou sa.
« Suit ak enfòmasyon yo ki genyen sou jounen lendi a direksyon an envite paran yo, elèv yo ak pwofesè yo pou yo pridan, nan sans sa pòt lekòl la ap rete fèmen 3 fevriye » se sa responsab yo nan GCBS la ekri nan yon nòt. Pandan lekòl “L’école Jean-Marie Guilloux” li menm tou fè pèsonèl li yo konnen yo pap louvri pòt yo.
Yon lòt bò, genyen Polis Nasyonal Ayiti a (PNH) ki di li an alèt suit ak menm menas gang yo. Nan yon kominike yo pibliye aswè dimanch 2 fevriye a, lapolis di desizyon sa vini aprè nòt minis jistis lan ki konsène jan bandi yo menase pou fè dega nan peyi a.
Pou bay repons ak seri menas sa yo, PNH fè konnen direktè jeneral la, Rameau Normil pase enstriksyon bay tout moun pou yo ka kenbe twoup yo an vijilans maksimòm epi adopte tout mezi nesesè yo. Tout sa se yon fason pou anpeche posib atak gang yo sou popilasyon an.
N ap raple, depi 9è nan aswè dimanch 2 fevriye a, gwo kout bal t ap chante nan Laplèn, sitou nan nivo wout nasyonal nimewo 1 an.
Atik sa se pwopriyete prive ©️ Gwoup Medya MAGHAITI 2025
