Nan yon moman kote popilasyon ayisyen an pa sispann kouri pou bandi, plizyè atis ayisyen rele sekou pou Ayiti. Nan divès mesaj yo pataje sou rezo sosyàl yo, atis sa yo mande pou dirijan yo sispann goumen pou pran resous peyi a.
Gessica Généus, Anie Alerte, Rutshelle Guillaume, Mickael Guirand, Vanessa Désiré, Kenny Haïti se pami atis ki pa mete dlo nan bouch yo pou denonse sitiyasyon Ayisyen ap viv aktyèlman nan peyi a.
Pandan gen nan yo ki ap mande lapè, ak chans pou pèp la viv yon lavi miyò genyen tou ki pa pè lonje dwèt sou otorite yo nan peyi a.
« Ki nivo ilizyon nou kreye nan tèt nou kòm dirijan ki fè nou gen kè ak odas pou nou kanpe nan figi yon pèp nou paka pwoteje », daprè pawòl aktris Gessica Généus ki kwè jounen jodi a pa gen anyen pou chèf ap goumen pou vin dirije. Puiske li soulinye pa gen pyès resous ankò.
Pi lwen, nou jwenn tou Anie Alerte ki se youn nan atis ki te angaje l nan reyalizasyon konstriksyon kanal Wanament lan. Nan refleksyon pa li a, li panche sou kilès ki pwoblèm Ayiti a tout bon vre ak kilès ki solisyon an. Ofinal, li lonje dwèt sou dirijan yo ki pa sispann vòlè pèp la san fè kichòy pou retire yo nan sitiyasyon vyolans sa fas ak bandi ak zam yo.
Fòk nou di, pou kounye a atis tankou Anie Alerte, Tafa Mi Solèy, Belo, Cantave K ak Franciso Silva ap mennen yon kanpay pou lapè an Ayiti. Demach sa antre nan kad kanpay nasyonal pou lapè ak pwomosyon dwa moun Asosiyasyon Tamise ap mennen anba tèm « Ayiti louvri chimen pou lapè ».
N ap soulinye, vandredi 15 novanm 2024 la, atis Mickael Guirand li menm te pèdi Claire Guirand Villard ki se yon manm nan fanmi li. Madanm sa mouri aprè li te resevwa yon bal mawon lakay li nan zòn Tijo.
Atik sa se pwopriyete prive ©️ Gwoup Medya MAGHAITI 2024
