Daprè deklarasyon komisè Senmak la, Venson François genyen plis pase 70 manm popilasyon an ki masakre nan atak gang Savyen yo fè nan Ponsonde ayè jedi 3 oktòb la. Jouskounye a se yon bilan pasyèl, puiske responsab jiridiksyon Senmak la fè konnen evalyasyon yo poko fin fèt.
Mete sou kote moun sa yo ki jwenn lanmò yo, gen plizyè lòt ki sòti blese ak plizyè kay ki boule. Pou kounye a, komisè a fè konnen lapolis deja ap pran tout dispozisyon nesesè yon fason pou fè fas kare ak bandi yo si yo ta deside atake vil la ankò.
Yon lòt kote, genyen tou komisè Jude Jean Chéry ki konseye tout abitan Senmak yo pou rete tèt frèt epi vijilan pou yo pa viktim. Nan sans sa, nan konferans pou laprès li bay ayè jedi a li fè konnen gentan gen yon santèn deplase nan vil la, men asire moun yo liy defans vil la toujou la e lapolis gen kontwòl sitiyasyon an.
Nan menm dosye sa Monsenyè Max Leroy Mésidor pa mete dlo nan bouch li pou kritike gouvènman tranzisyon an dèske yo kite sitiyasyon sekiritè peyi a rive nan pwen sa.
«Kisa n ap tann pou n deside vrèman bay pèp la posiblite pou l viv anpè lakay li, konbyen zòn n ap kite tonbe ankò avan nou montre nou gen sansiblite pou pèp la. Pèp la bouke li mande sekou, otorite yo ouvri zorèy nou, souke kò nou bagay la grav», se pawòl sa yo nimewo 1 nan tèt evèk katolik Ayiti yo deklare nan yon mesaj li fè pase. Pandan li mande pou gouvènman an fè sa l konnen pou kanpe rigòl san ki pa sispann koule nan peyi a.
Atik sa se pwopriyete prive ©️ Gwoup Medya MAGHAITI 2024
