Nan yon rapò yo sòti, Òganizasyon Migrasyon Entènasyonal (OIM) fè konnen gen plis pase 50 000 moun ki kouri kite kay yo Mibalè ak Sodo aprè atak bandi yo. Selon sa yo presize, yo anrejistre chif sa a sòti 13 mas pou rive 16 avril 2025 lan.
«Se yon total 51 466 moun ki deplase kounye a akoz atak sa yo», daprè sa nou li nan dokiman sa ki fè kwè gen 24% nan moun sa yo ki egal ak 12 584 moun ki oblije al rete nan 95 kan deplase. Rès moun yo ki evalye ak 76 % jwenn refij kay yon fanmi. Pou sa ki gen pou wè ak moun ki nan kan yo, yo soulinye gen 24 % ladan yo ki Boukan Kare, 21% nan vil Ench, 17% Laskawobas, epi 11 % ale nan lokalite Savanèt.
Nan zòn Boukan Kare, yo mansyone gen 22 kan ki gen 6 192 deplase ladan yo. OCHA nan bò pa li, revele divès kan sa yo chaje ak moun. E anpil nan moun sa yo se moun ki gen siy pòs twomatik.
Òganis nasyonzini an raple pandan atak sa yo genyen 76 moun ki pèdi lavi yo. Pou byen materyèl yo, li di gen plizyè enstitisyon tankou komisarya, prizon, ponp gaz ak 12 lòt kay bandi boule. Pou sa ki konsènan enstitisyon edikatif yo, yo deklare : «depi lè vyolans lan, tout lekòl Mibalè ak Sodo fèmen pòt yo».
Pou fini, OCHA fè konnen repons imanitè yo vin pi difisil akoz divès pwoblèm. Pami yo, yo site pwoblèm rezo telefonik yo, pa gen kouran sa ki fè pa gen twòp kominikasyon, epi gwo difikilte nan sèvis transfè lajan yo.
Atik sa se pwopriyete prive ©️ Gwoup Medya MAGHAITI 2025
