Pandan otorite polisyè yo te anonse lendi 27 janvye pase a yo te touye plizyè bandi malgre yo pa t gen chif, men sa pa anpeche gang ak zam yo kontinye ap teworize manm nan popilasyon Kenskòf la. Daprè ansyen depite Louis André Gustave, bandi yo gentan touye plis pase 44 manm popilasyon an.
Jiska maten mèkredi 29 janvye 2025 lan, bandi yo kontinye ap simen latwoublay nan komin nan kote yo mete dife e fè abitan yo kouri kite kay yo. Daprè ansyen depite Louis André Gustave ki t ap pale sou Radyo Karayib, se plis pase 44 moun ki deja pèdi lavi yo nan nouvèl atak sa gang yo fè sou komin nan.
Ansyen palmantè a ki t ap bay enpresyon l sou atak bandi yo fè Kenskòf la deklare komin nan gentan antre nan lis teritwa pèdi yo. Puiske, li soulinye menm abilans paka al pran kadav moun yo sa ki fè se nan twou pou yo mete yo osnon rete atè pou chen manje yo.
Pou l montre nan ki nivo leta pèdi kontwòl lokalite sa, li eksplike jounen jodi a pèsonn moun paka antre lakay yo. Gen moun daprè sa l di ki oblije al pran refij yo anba bannann oswa nan twou wòch. Louis André Gustave kwè fas ak sitiyasyon sa se sèlman lapolis ki pou vini ak gwo materyèl pou pran mesye yo sou nenpòt fòm nan.
Daprè Alter Radio, gang ak zam yo k ap feraye nan komin Kenskòf la deja tabli baz yo nan anviwon 7 zòn. Li site Belo ak Godèt kòm 2 nan zòn bandi yo pran yo.
Atik sa se pwopriyete prive ©️ Gwoup Medya MAGHAITI 2025
