Nan yon rapò yo pibliye ayè lendi 3 fevriye 2025 lan, Òganizasyon Entènasyonal Migrasyon (OIM) fè konnen genyen 1 669 moun ki kouri kite kay yo pou bandi nan Kenskòf. Selon presizyon yo bay, 67% nan moun sa yo jwenn refij yo kay yon fanmi, tandiske 33 % nan moun yo oblije ale nan 3 kan refijye ki fenk fèt.
Nan rapò sa, OIM soulinye 1 669 moun sa yo sòti nan 2yèm seksyon kominal Bonga ak 3yèm seksyon Soukay. Ladan yo genyen 345 ki al rete kay yon fanmi, epi 550 lòt twouve yo nan lokal EFACAP, nan Gibè ak lekòl Nasyonal Fisi.
Yon lòt bò, Biwo Entegre Nasyonzini an Ayiti (BINUH) nan yon kominike yo pibliye menm lendi sa mansyone kijan sitiyasyon dwa moun nan peyi a ap vin pi mal. Nan sans sa yo site 1 732 moun pou pi piti ki mouri ak 411 lòt ki blese sòti premye oktòb pou te rive 31 desanm 2024 la. Yo di tou nan menm peryòd sa gang yo kidnape 431 moun san l pa bliye presize divès moun ki mouri nan masak.
N ap raple, 1 669 moun sa yo te kite lakay yo aprè atak nèg ak zam te fè Kenskòf, 27 ak 28 janvye 2025 lan.
Atik sa se pwopriyete prive ©️ Gwoup Medya MAGHAITI 2025
