Aprè nèg ak zam te atake ayè lendi 20 janvye a yon machin anbasad Etazini, jounen madi 21 janvye 2025 lan, bandi rive tire sou 2 machin Konsila endyen an sou wout Ayewopò a. Sa ki fè pitit fi konsil la ak 2 chofè yo sòti blese.
Atak sa fèt nan moman moun sa yo t ap ale nan biwo Konsil la ki twouve l nan Sat, komin Site Solèy. E se la tou pitit fi konsil la, ki te nan youn nan machin yo ak 2 chofè yo sòti blese. Pou kounye a, moun sa yo twouve yo lopital ap pran swen ka yo mande.
Malgre prezans plizyè sòlda etranje nan peyi a, sa pa anpeche zak vyolans yo kontinye. Poutan, genyen otorite yo ki yo menm pa sispann pwomèt pou mete sekirite nan peyi a, menmsi sitiyasyon an ap vin pi mal chak jou.
N ap raple, komin Site Solèy sitou zòn Sat ak Tènwa sou tansyon depi dimanch 19 janvye 2025 lan. Jodi madi a, pou yon lòt fwa ankò anpil lekòl oblije kite pòt yo fèmen. Lopital ak sant medikal yo oblije fèmen avan lè, yon sitiyasyon ki lage gwo kè kase bò kote pèsonèl yo, puiske anpil nan yo ap sòti nan lòt komin pou vin bay popilasyon sa laswenyay.
Atik sa se pwopriyete prive ©️ Gwoup Medya MAGHAITI 2025
