Pandan gwo operasyon lapolis ap mennen nan Petyonvil, Boudon ak Kanapevè jodi madi 19 novanm 2024 la kont nèg ak zam, direktè egzekitif Rezo Nasyonal k ap Defann Dwa Moun yo(RNDDH), Pierre Espérance mande pou popilasyon an kontinye ede fòs lòd yo. Selon deklarasyon defansè dwa moun nan gen pou pi piti 45 bandi ki pran bw@ k@le jodi a nan operasyon sa a.
«Nou menm nou ankouraje pou maryaj ant polis ak popilasyon an kontinye, pou yo mache sou bandi yo», daprè sa Pierre Espérance deklare. Pandantan sa, li fè konprann jou bandi yo konte kounye a nan peyi a paske pèp ayisyen an pa kapab ankò.
Konsa tou, li mande pou manm gang yo livre chèf ki nan tèt yo a, paske li eksplike pap gen chans pou yo lè lapolis ak popilasyon an kenbe yo. Anplis sa, li lanse yon pinga pou 2 fòs sa yo k ap goumen kont bandi a pou di yo pa pran pawòl nan men pyès moun ki ta vle yo kanpe sou operasyon yo lanse a.
N ap soulinye jodi madi 19 novanm nan, maryaj ant popilasyon ak lapolis la bay bon jan rezilta. Puiske, bilan pasyèl yo fè kwè genyen pou pi piti 45 bandi ki mouri mete sou kamyon, bis epi zam tankou kalashnikòv lapolis te rive sezi nan men yo pandan yo ta pral atake Petyonvil byen bonè jodi a.
Atik sa se pwopriyete prive ©️ Gwoup Medya MAGHAITI 2024
