Ayè samdi 28 septanm 2024 la, Gine di li pare pou l voye 650 ofisye polis ak jandam li an Ayiti. Deplwaman sa ap fèt nan kad fòs estabilizasyon miltinasyonal la puiske fòs etranjè a genyen wòl pou frennen vyolans gang yo.
Se nan 79yèm asanble jeneral Nasyonzini an Premye minis Gineyen an, Amadou Oury Bah anonse peyi li a ap patisipe nan jefò pou mete lapè an Ayiti, anba otorite Nasyonzini yo. Nan sans sa, li deklare peyi li a pare pou voye 650 polis ak jandam pou estabilizasyon Ayiti ki ap soufri lontan.
N ap soulinye, Nasyonzini pwolonje pou 2 oktòb 2025 Misyon Miltinasyonal Sipò ak Sekirite (MMSS) la an Ayiti. Se Sèvis Nasyonal Polis Kenya a ki te konfime enfòmasyon an nan yon piblikasyon sou kont Twitè li, vandredi ki te 27 septanm 2024 la.
Pandantan sa, yo di yo pwomèt y ap kenbe angajman yo nan aplikasyon lwa entènasyonal yo. Yon fason pou kapab travay men nan menm ak pèp ayisyen an ak patnè ki sipòte MMSS la pou asire lapè ak sekirite an Ayiti.
Atik sa se pwopriyete prive ©️ Gwoup Medya MAGHAITI 2024
