Daprè Gwoup k ap Apiye Rapatriye ak Refijye yo (GARR), pou mwa desanm ki sot pase a, Sendomeng rapatriye yon total 17 840 Ayisyen epi depòte 42 041 lòt. Li soulinye tou genyen 31 368 Ayisyen ki deside tounen nan peyi yo pou kont yo.
Nan yon rapò li rann piblik jodi vandredi 31 janvye 2025 lan, òganis k ap defann dwa refijye yo fè konnen sitiyasyon migran ayisyen k ap viv nan peyi vwazen an konnen yon eta kritik pandan mwa desanm 2024 la. Kote li mansyone moun sa yo ap fè fas ak abi tankou arestasyon, byen ta, anndan lakay yo pandan yo pa menm jwenn chans pran afè yo.
GARR nan rapò sa vle atire atansyon sou kondisyon yo trete Ayisyen yo lè yo arete yo. Li fè konnen, yo mete yo nan prizon nan move kondisyon puiske yo manke jwenn dlo, manje, swen sante epi yo nan yon espas ki sal anpil. Pi lwen, li soulinye temwen yo revele yo bat moun yo, yo ba yo gaz lakrimojèn, kout baton e menm kouran elektrik.
Nan menm dokiman sa, òganizasyon ayisyèn nan endike fanm ki imigre yo pi vilinerab fas ak sitiyasyon sa. Moun sa yo daprè sa GARR di, sibi agresyon seksèl ak asèlman seksyèl.
Nan sans sa, òganis lan di li estime depòtasyon otorite yo ap fè pa fèt nan yon klima lapè akoz fanm ansent, timoun ak moun andikape yo jwenn arestasyon epi yo mete yo deyò. Se sa k fè GARR di li kondane ak tout fòs li jan otorite yo vyole dwa moun yo.
Pou tout rezon sa yo, GARR mande ak leta ayisyen pou l pran responsablite l nan ranfòse mekanis pwoteksyon dwa moun, anplis pou l bay asistans imedya ak moun ki retounen yo. Li mande ak kominote entènasyonal la pou l fè presyon sou Repiblik Dominikèn yon fason pou yo ka trete migran ayisyen yo avèk respè.
Atik sa se pwopriyete prive ©️ Gwoup Medya MAGHAITI 2025
