Ministè piblik nan Repiblik Dominikèn anonse yo arete 9 polisye ak yon sivil ki nan yon rezo kriminèl ki t ap vòlè bal nan lapolis la. Selon Diario Libre, nan operasyon ki rele «Pandora» a, otorite yo jwenn gen plis pase 900 000 bal moun sa yo te fè kou yo konnen pou te vòlè anndan lapolis la.
Pami dominiken sa yo nou jwenn nan yon bò : Kolonèl Narciso Antonio Féliz Romero ki te la pou jere zam ak bal, Juan Miguel Pérez Soler ki se majistra adjwen seksyon zam, kapitèn Nelson Valdez ki te responsab depo zam, bal ak lòt materyèl lapolis dominikèn. Genyen tou, kapitèn ak oditè Víctor Manuel Santos ki te chanje rezilta yon odi ki te fèt nan mwa fevriye a nan lide pou te kache santèn bal ki t ap pèdi yo.
Yon lòt bò, genyen sous-lyetnan Marino Antonio Rodríguez Toribio ki se amirye Direksyon Rejyonal Santral vil Cibao, Sèjan-majò Miguel Ángel Gómez Espaillat,
Kaporal Juan Luis Díaz Medina, Raso Rubiel Martínez alyas Escobar, sòlda Moreibin Medina Pérez ak sivil Miguelina Bello Segura.
Anplis sa, jounal la fè konnen se 200 ajan nan divès inite nan lapolis dominikèn nan ak 40 pwokirè ki te met men pou bout ak operasyon sa ki t ap mennen depi mwa oktòb la. Daprè ministè a, rezo sa te konn ap vòlè bal pou t al vann pou kont yo ak kèk endividi.
N ap soulinye, nan operasyon sa a otorite jidisyè yo rive sezi plizyè zam, bal ak plizyè santèn tranzaksyon lajan. Prèv sa yo pral ede nan enstriksyon jij ki sou dosye a.
Atik sa se pwopriyete prive ©️ Gwoup Medya MAGHAITI 2024
