Aprè yo te kanpe pwogram imanitè pawòl la 2 dawout pase a pou dezòd ki te genyen, gouvènman Biden nan anonse jodi jedi 29 dawout 2024 la, pwogram nan ap kontinye fè chimen l. Selon Miami Herald, fwa sa responsab ameriken yo asire gen bon jan mezi ki pran pou menm magouy yo pa repete ankò.
“Ak gwo kontwòl sa yo nou apènn mete sou moun ki ta dwe benefisye pwogram nan pou antre Etazini li pral fè nouvo mezi sa yo ranfòse bon kote pwosesis yo. E y ap kontribye nan pwoteje zafè eksplwatasyon benefisyè yo ki te genyen an“, daprè deklarasyon youn nan pòt pawòl Depatman Sekirite Enteryè (DHS) yo.
Daprè jounal ameriken an, kounye a esponsò yo ki twouve yo Etazini ap gen pou bay anpwent yo, e kapab gen gwo kontwòl sou lajan yo posede ak dosye kriminèl yo ta genyen. Mete sou sa, li fè konnen USCIS pral mete sou pye divès mwayen pou kapab idantifye tout esponsò ki ap fè divès aplikasyon yo.
N ap fè konnen, selon chif gouvènman ameriken an rive mwa jiyè 2024 la, se plis pase yon demi milyon moun ki antre sou tè Tonton Sam nan nan kad pwogram nan. Daprè yo menm, chif sa konsène Kiba, Venezyela, Ayiti ak Nikaragwa.
CP: Europe1
Atik sa se pwopriyete prive ©️ Gwoup Medya MAGHAITI 2024
